Tatu anadaiwa kufanya kitendo hicho kwa madai kwamba mtoto huyo amekuwa akimsumbua kutokana na kujisaidia haja kubwa mara kwa mara na hivyo siku ya tukio alichoka na kuamua kumnyonga mtoto huyo ili kukomesha tabia yake. 

Inadaiwa kuwa mara baada ya baba wa mtoto James Lushingo ambaye anafanya kazi ya kinyozi kuwasili nyumbani hakumuona mwanawe na alipomuuliza mkewe alimjibu kuwa mtoto huyo alikuwa amelala chumbani na shangazi yake ambaye ana ulemavu wa kutosikia (kiziwi). 

Kwa mujibu wa majirani, James aliamua kwenda moja kwa moja katika nyumba aliyoambiwa amelala mwanae na kumkuta shangazi wa marehemu akiwa amelala peke yake bila mtoto hivyo alirudi tena kwa mkewe na kumhoji ambapo alitoa majibu ya kusita sita. 

Hatua hiyo ilimfanya James kwenda kwa Ofisa Mtendaji wa kijiji hicho kutoa taarifa na pia kuwafahamisha wanakijiji wengine ambao walianza kumsaka mtoto huyo hadi walipofanikiwa kukuta shimo katika kichaka eneo la jirani likiwa na dalili za kufukiwa kitu muda mfupi uliopita. 

“Hivyo wanakijiji hao waliamua kulifukua shimo hilo lenye urefu wa futi mbili na nusu na kuona miguu na mikono ya mtoto huyo ikichomoza katika shimo hilo na kisha kumfukua mwili mzima na kumueleza baba mzazi wa merehemu kuwa akatoe taarifa katika Kituo cha Polisi,” alisema jirani ambaye hakuwa tayari kutajwa jina. 

Alisema baadaye James alikwenda katika Kituo cha Polisi na kutoa taarifa huku akieleza kumshuku mkewe Tatu kutokana na maelezo yake ya awali ya kuwa na wasiwasi na kudanganya kuwa mtoto huyo alikuwa amelala na shangazi yake kwenye nyumba jirani na wanapoishi. 

Kaimu Kamanda wa Polisi Mkoa wa Shinyanga, Onesmo Lyanga jana alithibitisha kutokea kwa tukio hilo na kuwaeleza waandishi wa habari kuwa mtoto huyo alinyongwa na kufukiwa katika shimo la urefu wa futi mbili na nusu. 

Alisema mtuhumiwa anashikiliwa na jeshi hilo kwa uchunguzi zaidi na kwamba upelelezi ukikamilika atafikishwa mahakamani. Naye Fadhili Abdallah anaripoti kutoka Kigoma kuwa, jeshi la Polisi mkoani Kigoma linamtafuta mwanafunzi wa Shule ya sekondari Rwiche katika Halmashauri ya Wilaya Kigoma, Rehema Issa (22) ambaye alijifungua mtoto na kumtupa chooni jambo lililosababisha kifo cha mtoto huyo. 

Kaimu Kamanda wa Polisi mkoa Kigoma, Francis Mwakabana amesema hayo wakati akitoa taarifa kwa waandishi wa habari kuhusiana na matukio mbalimbali yaliyotokea mjini Kigoma katika wiki hii. Mwakabana alisema mwanafunzi huyo alijifungua mtoto huyo na kumtupa katika choo cha shimo cha Shule ya Msingi Nyangwe akiwa hai na baadaye kuokolewa na wanafunzi wa shule hiyo. 

Kamanda huyo alisema baada ya kuokolewa kutoka katika choo hicho cha shule kichanga hicho kilifariki muda mfupi baadaye na sasa mwili wake umehifadhiwa katika Hospitali ya Mkoa Kigoma ya Maweni. 

Kufuatia hali hiyo Kamanda huyo wa polisi amesema kuwa hivi sasa Jeshi hilo la Polisi mkoani Kigoma liko katika jitihada za kumtafuta mwanafunzi huyo ili aweze kukabiliana na tuhuma zinazomkabili za kutupa kichanga na kusababisha mauaji.

Akizungumza katika Hospitali ya KCMC alikolazwa, Selasini alisema kwamba chanzo cha ajali hiyo ni kupasuka kwa tairi ya mbele, suala ambalo linamshangaza kwa kuwa alibadilisha tairi zote na kuweka mpya siku tatu kabla ya ajali hiyo na hakuwahi kufanya safari yoyote ndefu zaidi ya kiyo ya kwenda Arusha na kurejea Moshi.

Aliitaka Serikali kufanya ukaguzi kupitia Shirika la Viwango nchini (TBS) kufanya uhakiki wa bidhaa zinazoingia nchini kutoka nje ya nchi kwani nyingi hazina viwango na zinasababisha madhara kwa wananchi.

Hata hivyo, hali ya Selasini aliyepata ajali hiyo katika  eneo la chuo cha ufundi Bomang’ombe wilayani Hai, Kilimanjaro,  barabara kuu ya Moshi-Arusha imeelezwa kuwa inaendelea vizuri.

Katika taarifa iliyotolewa kwa vyombo vya habari na kamanda wa polisi mkoani hapa, Absalom Mwakyoma ilieleza kuwa hali ya mbunge huyo kwa sasa inaendelea vizuri na kuwa aliteguka bega la mkono wa kulia.

Hata hivyo, hali ya mke wa mbunge huyo, Digna Kavishe (43) imeelezwa kuwa ni mbaya kutokana na majeraha aliyoyapata kichwani.

Kwa mujibu wa kamanda, katika ajali hiyo watu wanne walifariki dunia ambapo watatu kati yao walifariki papo hapo na mmoja alifariki wakati akipatiwa matibabu katika hospitali ya rufaa ya KCMC.

Kamanda aliwataja waliopoteza maisha kuwa ni Catherin Roman Selasin (80) mkazi wa Rombo, Agatha Jerome (85) mkazi wa Rombo na wanawake wawili ambao mpaka sasa hawajatambuliwa majina yao na wote walikua abiria katika gari la mbunge huyo.

Kwa mujibu wa kamanda, chanzo cha ajali hiyo bado kinachunguzwa licha ya uchunguzi wa awali kuonyesha kuwa ajali hiyo ilisababishwa na kupasuka kwa tairi ya mbele upande wa kulia baada ya kuingiliwa na pikipiki mbele na hivyo kukosa mwelekeo na kupinduka.

Alisema sababu nyingine inaonyesha kuwa mbunge huyo alikuwa katika mwendo kasi hali iliyomfanya ashindwe kumudu gari na hivyo kupoteza mwelekeo na kuwa miili ya marehemu imehifadhiwa katika hospitali ya rufaa ya KCMC.

Kutokana na ongezeko hilo, wapo wagonjwa walioshindwa kupata huduma ya matibabu kwasababu hawakuwa na fedha zinazotosheleza kupata huduma walizokuwa wakizihitaji.

Jana, Ofisa Uhusiano msaidizi wa Moi  Frank Matua alithibitisha kupanda kwa gharama hizo na kwamba jambo hilo ni utekelezaji wa sera za huduma za afya katika hosipitali hiyo. “Kweli gharama zimepanda, lakini, mchanganuo halisi bado haujapangwa,” alisema Matua alipozungumza na gazeti hili ofisini kwake jana.

Matua alisema kwa sasa taarifa bado hazijawa rasmi na unahitajika muda zaidi wa kuandaa takwimu za kuonyesha mchanganuo halisi wa gharama hizo zitakavyotozwa. Hata hivyo, uchunguzi wa gazeti hili umebaini kuwa ongezeko hilo linahusisha huduma zote zinazotolewa na taasisi hiyo.

Miongoni mwa huduma hizo ni kumwona daktari ambazo zimeongezeka kutoka Sh2,000 za awali hadi Sh8,000, huduma ya X - ray kutoka Sh5,000 hadi Sh9,000 wakati gharama za matibabu zimepanda kwa viwango tofauti kwa kuzingatia aina ya ugonjwa.

Kabla ya kupanda kwa gharama hizo za matibabu, uongozi wa Moi ulitoa tangazo ambalo limebandikwa kwenye ukuta ofisini kwa muhasibu likieleza kupanda kwa gharama hizo, lakini bila kuonyesha viwango vya ongezeko hilo. "Kuanzia Mei 21 mwaka huu gharama za matibabu zitapanda," inasomeka sehemu ya tangazao hilo lililopo kwenye ofisi ya mhasibu.

Mmoja wa wagonjwa waliokuwa wakisubiri matibabu ambaye alijitambulisha kwa jina la Abdallah Selemani, alisema ongezeko la gharama za tiba ni kikwazo kwa wagonjwa, kwani  wengi wao hawana uwezo wa kumudu gharama hizo.

“Wapo waliorudi nyumbani kwasababu ya ongezeko hilo ukizingatia kwamba imekua ghafla,”alisema Selemani.

Mwingine aliyejitambulisha kwa jina la Debora Ramadhani ambaye pia alikuwa akisubiri matibabu, alisema licha ya ongezeko la gharama za matibabu pia dawa wanazoandikiwa bei zake zimeongezeka na kwamba watu wa kawaida hawawezi kuzimudu.

“Baada ya kuandikiwa dawa na daktari unaambiwa ununue katika maduka yaliyopo katika eneo hilo, lakini wanauza dawa bei kubwa,”alisema Debora.

Mmoja wa wagonjwa  aliyongea na gazeti hili kwa njia ya simu, Yusuph Juma, aliyefika hospitalini hapo kwa ajili ya kutibiwa na kushindwa kupata huduma, alisema  gharama hizo zimebadilika kwa asilimia 300 na kufanya wagonjwa wengi kushindwa kupata matibabu.

Juma alifafanua kuwa awali wagonjwa waliokuwa wakitumia kadi za Bima ya Afya walikuwa wakilipa Sh21,000 kumuona daktari, lakini hivi sasa gharama hizo zimepanda kwa Sh 30,000.

“Na bei hiyo niya majira ya asubuhi, kuanzia mchana malipo ni Sh40,000 hiyo ni bei halali kabisa na stakabadhi zinatolewa kwa wagonjwa waliofanya malipo,”alisema Juma. Aliendelea kusema  kwa watu wanaolipa fedha tasilimu kumuona daktari ni Sh8,000 badala ya Sh 2000 ambayo ilikuwa ikitumika zamani.

Akizungumzia huduma za mazoezi ya viungo alisema kuwa na huko pia gharama zimepanda kutoka Sh10,000 hadi sh 15,000. Alisema kuwa mabadiliko ya gharama hizo za matibabu yalikuwa yakiwagusa sana wagonjwa wanaotibiuwa kwa kutumia fedha tasilimu tofauti na wale wanaotumia kadi za bima.

“Unajua wanaotibiwa kwa kadi wala huwa hawafanyi uchunguzi wa gharama wanazotumia tofauti na mgonjwa anayetoa fedha taslimu,”alisema na kuongeza:

“Wiki moja waliyotumia katika kutoa matangazo ya gharama mpya za matibabu haikuwa inatosha kwani imeleta usumbufu kwa wagonjwa wanaotoka  mikoani ukizingati sasa hivi kuna hali ngumu ya maisha”.

 

Kauli hiyo imekuja wakati Shibuda akiwa ameiligawa Baraza la Vijana la Chadema (Bavicha) baada ya mwenyekiti wake, John Heche kupingana hadharani na makamu wake, Juliana Shonza kuhusu msimamo wa baraza hilo dhidi ya hatua ya mbunge huyo  kutangaza nia ya kuwania urais, akiwa  ndani ya kikao cha Nec ya CCM.

 

Siku mbili baadaye Shibuda aliibuka tena na kumshukia Katibu Mkuu wa Chadema, Dk Willibrod Slaa, kuwa ndiye anayewatumia vijana hao kumhujumu, kauli ambayo ilipingwa vikali na Dk Slaa.

 

Lakini,  jana akiwa katika semina ya wabunge wa Bunge la Afrika Mashariki iliyowahusisha pia wenyeviti wa kamati zote za kudumu za Bunge wakiwemo wa Kamati ya Mambo ya Nje Ulinzi na Usalama, Shibuda alirudia kauli yake  na kuwafanya washiriki wa semina hiyo kuangua kicheko.

 

“Mimi naitwa John Shibuda ni Mbunge wa Maswa Mashariki na Mjumbe wa Kamati ya Mambo ya Nje, Ulinzi na Usalama, pia ninayetaka Rais Kikwete awe kampeni meneja wangu katika kampeni za mwaka 2015,” alisema wakati akijitambulisha.

 

Kauli hiyo ilizua zogo kwa baadhi ya washiriki wa semina hiyo ambao walianza kumpigia makofi huku Spika Makinda na Sitta wakiangua kicheko.

 

Shibuda juzi aliliambia Mwananchi kuwa yuko tayari kwa lolote na wakati wowote tena kwa asilimia 100 kutokana na kauli hiyo aliyoitolea katika kikao cha CCM.

 

Alisema kitendo cha Dk Slaa kutozungumzia shutuma zinazotolewa na vijana hao wa Chadema dhidi yake (Shibuda) kinampa fursa ya kuamini kwamba vigogo wa chama hicho wako nyuma yao.

Alimtaka Dk Slaa aeleze hadharani uovu wake huo ili Watanzania wafahamu ukweli kuhusu sakata hilo.

 

Akizungumza katika semina hiyo, Shibuda aliwataka wabunge wa Bunge la Afrika Mashariki kuzingatia mambo ya msingi kwa maslahi ya taifa.Pia aliwataka kuwa makini katika masuala ya ardhi na kutokubali kutumiwa.

 

“Siku zote penye uzia penyeza rupia, kuna tetesi kuwa rupia ilipitishwa kwa wabunge wa Bunge la Afrika Masharii, kwa hiyo kuweni makini, msikubali kutumika” alisema Shibuda.

 

Mwenyekiti wa wabunge hao, Alhaj Adam Kimbisa aliwapongeza waandaaji wa semina hiyo na kuahidi kuwa wataiwakilisha nchi katika bunge hilo kwa nguvu moja na kuweka mbele maslahi ya taifa.

Tangu Rais alipotangaza Baraza hilo Mei 4, mwaka huu timu hiyo nzima haijawahi kukutana na hicho ni kikao cha kwanza kwa mawaziri wote chini ya uenyekiti wa mkuu huyo wa nchi.

Katibu Mkuu Kiongozi, Balozi Ombeni Sefue amethibitisha kuwepo kwa kikao hicho akisema ni cha kwanza tangu kuteuliwa kwao.

“Ni kikao cha kawaida cha Baraza la Mawaziri. Ndiyo ni cha kwanza kwani tangu kuteuliwa kwa mawaziri hakuna kikao ambacho kimewahi kufanyika. Ni cha kawaida tu katika utendaji kazi wa baraza,” alisema Balozi Sefue.

Habari zaidi zinasema kuwa karibu mawaziri wote waliondoka jana kuelekea Dodoma kwa ajili ya kikao hicho ambacho kinafanyika kabla ya kuanza kwa Bunge la Bajeti mnamo Juni 12, mwaka huu.

“Wapo ambao wanaweza wakawa Dar es Salaam au nje kwa kazi maalumu. Hawa wanaweza kupata kibali cha Waziri Mkuu. Lakini, karibu mawaziri wote waliondoka jana kuelekea Dodoma,” kilidokeza chanzo kingine.

Hoja ya Bajeti

Kikao hicho kinatarajiwa kujadili bajeti hiyo ya mwaka 2012 ambayo pamoja na mambo mengine, inakabiliwa na changamoto mbalimbali ikiwemo namna ya kupunguza mfumuko wa bei.

Ingawa takwimu za mwezi huu kuhusu mfumuko wa bei zilizotolewa na Taasisi ya Taifa ya Takwimu (NBS), zinaonyesha kupungua kwa mfumuko huo kutoka asilimia 19 hadi 18.7, bado Watanzania wengi wamekuwa wakilalamikia ukali wa maisha.

Mfumuko huo ambao unagusa bidhaa muhimu kama sukari, pia unagusa nishati ya mafuta ikiwemo petroli na mafuta ya taa, hivyo kuongeza gharama za usafiri kuanzia kwa watu binafsi na abiria wanaotumia usafiri wa umma.

Tayari Chama cha Wamiliki wa Daladala Mkoa wa Dar es Salaam (Darcoboa), kimepeleka maombi Mamlaka ya Udhibiti wa Usafiri wa Nchi Kavu na Majini (Sumatra), wakitaka ongezeko la nauli kwa kiwango cha asilimia 150.

Lakini, kwa upande wa wafanyakazi, tayari kumekuwa na shinikizo la kutaka nyongeza ya mishahara kwa kiwango kinachoendana na mfumuko wa bei na ukali wa maisha unaotikisa nchi kwa sasa huku Shirikisho la Vyama vya Wafanyakazi Tanzania (Tucta), likiwa tayari limetoa angalizo kwa Serikali kutopuuza kilio hicho.

Changamoto nyingine ambayo Baraza hilo la Mawaziri inapaswa kukabiliana nayo katika kujadili Bajeti hiyo kabla ya kuwasilishwa bungeni ni kuhusu namna ya kupunguza gharama za uzalishaji wa chakula, ikiwemo kuhakikisha upatikanaji wa urahisi wa pembejeo za kilimo, ili kutekeleza kwa kasi Mpango wa Kilimo Kwanza.

Pia, Baraza hilo Mawaziri linapaswa kupitia kwa kina  vyanzo vipya vya mapato ya kodi ambavyo havitajikita katika vyanzo vilivyozoeleka ambavyo ni pamoja na kodi katika mishahara ya wafanyakazi huku baadhi ya wafanyabiashara wakubwa wakikwepa kodi.

Gazeti hili lilishuhudia msichana huyo mwenye umri wa miaka 17 (jina limehifadhiwa), akikamatwa juzi saa 6 usiku Sinza nyumbani kwa Mama Angel. Baada ya kukamatwa, majirani wa Mama Angel ambao walishiriki msiba wa mtoto huyo, walishirikiana kutaka kumchukulia sheria mkononi. 

Inadaiwa kuwa msichana huyo alisababisha kifo cha mtoto huyo wa miezi saba wakati Mama Angel akiwa kazini Machi mwaka huu na kutoroka nyumbani hapo. 

Kijana wa mwenye nyumba hiyo, Ally Hasan alidai alikuwa wa kwanza kugundua kuwa mtoto huyo amekufa baada ya Mama Angel kumpigia akimuomba kumuangalizia mtoto wake huyo aliyekuwa amemuacha amelala. 

Hasan alidai alipoingia ndani ya chumba cha Mama Angel, alimkuta mtoto huyo akiwa amelala na hakugundua kuwa alikuwa ameshakufa. 

Kwa mujibu wa madai ya Hasan, alitoa taarifa kwa Mama Angel kuwa mwanawe amelala na mama huyo alimuomba amuamshe ndipo alipogundua kuwa amekufa baada ya kuona haamki na kulazimika kutoa taarifa kwa mama mwenye mtoto alirudi nyumbani haraka. 

Alidai kuwa mama wa mtoto huyo alipofika na kukuta mtoto ameshakufa kwa kushirikiana na majirani walitoa taarifa Polisi na kumzika. 

Hasan alidai walianza harakati za kumtafuta msichana huyo wa kazi na kila walipompigia simu yake, inadaiwa alikuwa akiwajibu kimkato huku akikiri kuwa ameua mtoto huyo. 

Naye Mama Angel akizungumza na gazeti hili juzi usiku, alidai alifunga kula na akaamua kufanya ibada kumuomba Mungu amuoneshe alipo msichana huyo, ndipo juzi alipokuwa akipita eneo la Mwananyamala akiwa na mumewe, wakamuona akiwa mtaani. 

Alidai kuwa baada ya kumuona, walimkamata na wakampandisha katika teksi na kumpeleka nyumbani kwao Sinza ili kumhoji zaidi. 

Mwandishi wa gazeti hili aliyekuwa eneo la tukio wakati dada huyo akishushwa, alimshuhudia mfanyakazi huyo akilumbana na Mama Angel ambapo alimng’ata mama huyo katika bega hali iliyozua tafrani baada ya majirani wa mama huyo kujitokeza kwa wingi kumsaidia. 

Baada ya tafrani hiyo, msichana huyo wa kazi aliokolewa na wanaume waliokuwa eneo la jirani ambao walimkamata na kumpeleka nyuma ya nyumba wakamzunguka na kumlinda asidhurike na akinamama hao ambao wengi walikuwa wakidai kama msichana huyo amesababisha kifo, iweje yeye asiuawe. 

Mama mzazi wa mtoto huyo akiwa mwenye uchungu, alisikika akieleza kuwa binti huyo anapaswa kuchukuliwa hatua kwa mauaji ya mwanawe, huku akitaka kumuadhibu. Hata hivyo, wanaume waliokuwapo walizuia msichana huyo wa kazi asidhuriwe. 

Baadhi ya watu walipomhoji kuhusu kifo cha mtoto huyo, msichana huyo ambaye awali alionesha ujeuri kwa kusema watamfanya nini, baadaye alikuwa mpole na kudai mtoto huyo alimuacha ndani na hajui kilichomkuta. 

Baada ya saa moja, waliwasili askari Polisi wa Kituo cha Polisi Mabatini eneo la Sinza waliomchukua na kuondoka naye huku wananchi waliokuwapo nje wakitaka kumdhuru. 

Kamanda wa Polisi wa Mkoa wa Kinondoni, Charles Kenyela alipoulizwa, alisema analifuatilia suala hilo na atatoa taarifa baadaye.

Tayari Shibuda ameigawa Bavicha baada ya Mwenyekiti wake, John Heche kupingana hadharani na makamu wake, Juliana Shonza kuhusu msimamo wa baraza hilo dhidi ya hatua ya mbunge huyo kutangaza dhamira ya kuwania urais mwaka 2015 ndani ya Nec ya CCM na kumwomba Mwenyekiti wa chama hicho tawala, Rais Jakaya Kikwete awe kampeni meneja wake. 

Wakati kauli zake hizo ndani ya Nec ya CCM zikitarajiwa kumweka katika hatari ya kufukuzwa ndani ya Chadema kipindi hiki ambacho amekuwa katika uangalizi maalum, Shibuda jana aliliambia Mwananchi kwamba, yuko tayari kwa lolote na wakati wowote tena kwa asilimia 100.

Shibuda alifafanua kwamba anatuhumiwa kukihujumu chama huku akiwa hajawahi kukiuka maagizo yoyote ya Kamati Kuu ndani ya Chadema , lakini amebaini  kuna baadhi ya watu wanatumiwa na viongozi wa juu wa chama hicho akiwamo Dk Slaa kwa lengo la kumfanyia fitina na hujuma.

Alisema kitendo cha Dk Slaa kukalia kimya shutuma zinazoelekezwa kwake na vijana hao wa Chadema kinampa fursa ya kuamini kwamba vigogo wa chama hicho wako nyuma yao na kumtaka sasa Dk Slaa aeleza hadharani uovu wake huo ili Watanzania wafahamu ukweli kuhusu sakata hilo.

"Mimi sina kosa lolote ila ninachofikiria ni kwamba Bavicha wanatumiwa na viongozi wa juu wa Chama ili kutaka kuniharibia lakini cha msingi ni vyema Katibu Mkuu wetu (Dk Slaa), akaweka hadharani maovu yangu ili Watanzania wajue makosa yangu ni yapi," alisema Shibuda na kuongeza:

"Ni wakati wa Chadema kupitia viongozi wake wakuu  kueleza ubora wake wa kuwaongoza wananchi uko wapi kwani kama mtu anatangaza nia na kuonekana ameenda kinyume, sidhani kama kuna uongozi thabiti."

Akizungumzia kitisho cha kuweza kufukuzwa Chadema,  Shibuda alisema  kwa sasa yupo tayari kwa asilimia 100 kupokea  jambo lolote litakalotokea dhidi yake ndani ya chama hicho na kwamba kinachotakiwa ni kuonyeshwa makosa yake.

"Kwa asilimia 100, kutoka moyoni nasema nipo tayari kwa lolote litakalotokea kwangu ndani ya Chadema, kwani mimi natambua wazi  sina kosa nililolifanya na kama nina makosa basi yaanikwe hadharani ili wananchi nao watambue," alisema.

Akizungumzia kupewa barua ya karipio kali,  Shibuda alisema kwamba, hata siku moja hajawahi kupewa barua yoyote ya karipio kali na hafahamu chochote juu ya suala hilo.

"Sikiliza ndugu mwandishi, mimi sijawahi kupewa barua yoyote ya karipio kali na sifahamu chochote juu ya suala hilo labda hao walionipa barua hiyo wangeeleza lini walinipa," alisema.  

Akizungumzia tuhuma hizo za Shibuda,  Dk Slaa alisema asingependa kuingizwa katika mjadala huo kwani hajawahi kumzungumzia Mbunge huyo kuhusu jambo lolote wakati wowote tangu mjadala wake na Bavicha ulipoanza.

Alisema haoni suala la Shibuda kama ni jambo la kuzungumzia kwa sasa kwani halina msingi na kuna mambo mengi ya kujadili ili kuliwezesha taifa kupambana na umasikini.

"Mimi nisingependa kuhusishwa na suala la Shibuda kwani sijawahi kuzungumza chochote kumhusu yeye na kwamba, nina mambo mengi ya kuangalia na sio Shibuda," alisema Dk Slaa na kuongeza: "Sipendi kuzungumzia kauli za watu hata kidogo kwani tunakazi kubwa ya kupambana na kuwakomboa wananchi kutoka katika umasikini."

Heche, akizungumzia tuhuma hizo kwamba Bavicha inatumiwa  kumhujumu Shibuda, alisema hawezi kuzungumzia suala la Shibuda sasa kwa kuwa tayari kuna vikao vimeanza kukaa kulijadili. Alisema baada ya kukamilika kwa vikao vya Kamati tendaji ya Bavicha, watatoa majibu sahihi yanayohusu masula mbalimbali ya vijana, lakini pia watatoa ufafanuzi na msimamo wao kuhusu Shibuda.

“Tuna vikao ambavyo vinaanza kesho (leo) na  baada ya kumalizika ndipo tunaweza kutoa ufafanuzi kuhusu mambo yote tutakayojadili ikiwa ni pamoja na msimamao wetu kuhusu Shibuda,” alisema Heche.

Hi ni mara ya tatu kwa Shibuda kuingia katika mgogoro wa ndani ya chama kwani, mara ya kwanza aliwahi kukiuka msimamo wa wabunge wa Chadema kutoka nje ya ukumbi wa bunge kwa kupinga matokeo yaliyompa Kikwete Urais badala yake usiku alihudhuria dhifa maalumu Ikulu ndogo Chamwino baada ya mkuu huyo wa nchi kuzindua Bunge la kumi.

Shibuda pia aliwahi kuingia katika mgogoro na chama hicho kutokana na msimamo wake wa kuendelea kupokea posho za bunge na kutaka ziongezwe hadi kufika Sh500,000, akiziita "ujira wa mwiha," huku akirusha vijembe kwa baadhi ya wabunge wenzake akisema ni wafanyabiashara siyo wabunge jamii. 

Matukio hayo yalimfanya aundiwe Kamati Maalumu chini ya Profesa Abdalla Safari kwa lengo la kuangalia nyendo zake na matokeo yake, ni kuwa chini ya uangalizi maalum ndani ya miaka miwili kuanzia sasa vinginevyo CC imfukuze lakini, ameibua mjadala mwingine wakati hata mwaka huo wa uangalizi maalumu haujakamilika.

Katika sakata hilo la sasa tayari kumeibuka mvutano ndani ya Bavicha baada ya Shonza kupinga tamko la Heche ambapo Mei 20, aliitisha mkutano na waandishi wa habari na kusema,  “Naomba ifahamike kwamba tamko alilolitoa Heche siyo la 

Baraza, bali ni lake kama Heche. Alipokuwa akitoa tamko hilo hakukuwa na kikao chochote cha Baraza cha viongozi wa kitaifa wala Sekretarieti ya Baraza la Vijana la Chadema ili kulijadili suala hili kwa kina bali, alitumia mwamvuli wa vijana kuhalalisha hoja yake.”

Hata hivyo, siku hiyo ya jioni Heche naye alitoa taarifa kwa umma akisema,  “Nimejulishwa kuwa Makamu wangu (Shonza), leo (Mei 20) amezungumza na vyombo vya habari na kukanusha taarifa niliyotoa kwa niaba ya Bavicha.

Itambulike kuwa majukumu na mamlaka ya mwenyekiti na kiongozi mwingine yeyote wa Baraza yanabainishwa na Kanuni za Baraza letu kifungu 5.4.1, ambayo mwenyekiti ndiye msemaji mkuu wa Baraza na pia ndiye kiongozi mkuu wa Baraza katika ngazi husika.”

Hatua hiyo imekuja baada ya kamati hiyo iliyokuwa ikiongozwa na Makamu Mwenyekiti, Rosweeter Kasikila kukutana na Uongozi wa Vyuo Vikuu vya Dar es Salaam na Mzumbe ili kujionea hali ya Ukimwi katika vyuo hivyo.

Waziri wa Afya na Chakula wa Serikali ya wanafunzi wa UDSM, Cosmas Nzowa aliiambia kamati hiyo jana jijini Dar es Salaam kwamba , wanafunzi wengi wanaonekana kwenye sehemu za starehe wakijiuza kwa sababu wameshindwa kuendesha maisha yao.

 “Wamefika chuoni wakitokea mikoani wakakuta hakuna mikopo wala mabweni ya kulala na hawana ndugu hapa jijini, unategemea wafanye nini, sasa wengi wanajiuza ili kujikimu, ukitembelea sehemu nyingi za starehe utawakuta,” alisema Nzowa.

Alisema , mchana wanakwenda chuoni lakini usiku wanakuwa na shughuli nyingine za kujiongezea mapato.

Aliongeza kuwa hata wanafunzi wanaume wanapokosa mikopo na mabweni ya kulala vyuoni huwa katika wakati mgumu na kulazimika kuishi na wanawake waliowazidi umri huko mitaani.

“ Sasa huku hatufahamu kama wanafunzi hawa watakuwa salama katika maambukizi ya virusi vya Ukimwi kwani ni jambo la kawaida kukuta kijana mdogo wa chuo kikuu akiishi na shugamami mtaani,” alisema Nzowa.

Alisema ili kurekebisha hali hiyo utaratibu wa utoaji wa mikopo hauna budi kubadilishwa ili wanafunzi kabla hawajafika chuoni wawe wanafahamu kama watapata mikopo au la.

Aliongeza kuwa ,serikali iweke kipaumbele kwa kuongeza idadi ya mabweni inayolingana na wanachuo 15,000 waliopo hivi sasa.

“ Ili kuwasaidia wenzetu ambao wamekosa maeneo ya kuishi na hawana fedha, inabidi tuishi watu wanne kwenye vyumba vidogo na hivyo kusoma katika mazingira magumu,” alisema Nzowa anayesomea Shahada ya kwanza ya Sayansi ya Jamii na Kiswahili.

Aliwaambia wabunge hao kwamba, wanafunzi hao wako katika hatari ya kupata maambukizo ya virusi vya ukimwi kutokana na mazingira magumu wanayoishi.

“Tunaiomba kamati hii itutembelee chuoni ili isikilize kilio cha wanafunzi hao,”alisema.

Mratibu wa Ukimwi katika Chuo Kikuu cha Dar es Salaam, Dk Kitila Mkumbo aliieleza kamati hiyo kwamba, maambukizo katika chuo hicho baada ya kupima  mwaka 2011 ni asilimia 2.3.

Makamu Mwenyekiti wa kamati, Kasikila alitaka uongozi wa chuo hicho kuwasilisha mbele ya kamati hiyo taarifa yenye kueleza matatizo mbalimbali yanayokwamisha mapambano dhidi ya Ukimwi chuoni hapo.

“Tukipata taarifa yenye changamoto mbalimbali itawasaidia wabunge kutetea Bungeni hasa katika suala zima za upatikanaji wa fedha za shughuli za Ukimwi,” alisema Kisikila.

Akichangia,  Mjumbe wa Kamati hiyo na Mbunge wa Mtambile, Masoud Abdalla  Salim alisema mavazi wanayovaa wanafunzi wa UDSM yanahamasisha ngono.

“ Wanafunzi wa kike katika chuo hiki hawatofautishi mavazi ya disko na ya darasani, wanatembea nusu uchi hebu jifunzeni kwa wenzenu wa Chuo cha Biashara (CBE) wamedhibiti hilo,” alisema.Naye Mbunge wa Busega, Dk Titus Kamani alisema matatizo ya kifedha ya wanafunzi wa vyuo vikuu yanaweza kuwa kuwa kichocheo cha maambukizi ya Ukimwi.

Akizungumza katika makabidhiano hayo, yaliyofanyika makao makuu ya Shirikisho la Soka Tanzania (TFF) Jijini Dar es Salaam jana, Mkurugenzi wa Masoko wa SBL, Ephraim Mafuru alisema wao wametoa Sh 15 milioni na NMB wametoa 15 milioni ambazo kwa pamoja pamoja ni 30 milioni.

Mafuru alisema wametoa msaada huo baada ya kuombwa na serikali kuisaidia Twiga Stars ambayo haina mdhamini.

"Kwa kuzingatia umuhimu wa kuisaidia timu hii ya wanawake tulikutana na NMB, ambao walikuwa wadhamini wenzetu katika timu ya soka ya wanaume, Taifa Stars kabla ya kujitoa mwaka jana, tukakubaliana kuisaidia kwa kiwango hicho,"alisema Mafuru.

Kwa upande wake, Meneja Masoko wa NMB, Imani Kajula alisema wao kama wadau wakubwa wa michezo wameona umuhimu wa kuisaidia timu hiyo na pia kuanzisha kampeni ya kuitafutia misaada zaidi kwa kufungua akaunti iitwayo 'Changia Twiga Stars' na amewataka wadau na makampuni mengine kuichangia timu hiyo kupitia akaunti hiyo. 

"Kwa kuwa benki yetu ina matawi mengi nchini itakuwa rahisi kwa wadau kuchangia kupitia akaunti hiyo na kufanikisha lengo la timu hiyo ya wanawake yenye utashi mkubwa,"alisema Kajula.

Naye Kocha Msaidizi wa timu hiyo, Nasra Mohamed aliwashukuru SBL na NMB kwa msaada huo na kuahidi matokeo mazuri katika mechi yao dhidi ya Ethiopia itakayochezwa Mei 27 mjini Addis Ababa.

Nasra pia aliwashukuru Waziri wa Habari, Vijana, Utamaduni na Michezo na Mwenyekiti wa Baraza la Michezo la Taifa (BMT), Dioniz Malinzi walioitembelea kambi ya timu hiyo hapo jana na kutoa  posho ya siku 16 kwa wachezaji na makocha wa timu hiyo. 

Nasra pia amewataka Watanzania kutokatishwa tamaa na matokeo ya timu hiyo baada ya kufungwa mechi mbili mfululizo za kujipima nguvu dhidi ya Zimbabwe na Afrika Kusini, kwani kupitia mechi hizo wamebaini upungufu wa timu na kuyafanyia kazi na sasa wanaamini timu iko tayari kuleta matokeo mazuri.

Akizungumza katika makabidhiano hayo Mkurugenzi wa Ufundi wa TFF, Sunday Burton Kayuni alisema timu hiyo inakabiliwa na hali mbaya kifedha ndiyo maana TFF kwa kushirikiana na serikali ikaamua ikaamua kusaka wafadhili.

Naye Kaimu Mkurugenzi wa Wizara ya Maendeleo ya Vijana Utamaduni na Michezo,   Juliana Yassoda aliwashukuru SBL na NMB na pia ametoa wito kwa makampuni mengine nchini kuiga mfano wa makampuni hayo kwa kusaidia timu hiyo ili iweze kufuzu kwa mara ya pili mfululizo kucheza Fainali za Mataifa ya Afrika kwani ina uwezo huo ikipigwa jeki.

Twiga Stars ambayo ipo kwenye kinyang'anyiro cha kuwania tiketi ya kucheza Fainali za Mataifa ya Afrika kwa wanawake na itaondoka leo saa 11:00 jioni na ndege ya Ethiopian Airlines kuelekea Addis Ababa, ambapo itacheza Mei27 na itarejea Mei 28 kwa ajili ya kujiandaa kwa mchezo wa marudiano utakaofanyika hapa Jijini Dar es Salaam Juni 16.